મહેમદાવાદમાં સ્વયંસેવકોનું ભવ્ય પથ સંચલન,વિવિધ માર્ગો પર પુષ્પવર્ષાથી સ્વાગત કર્યું

રાષ્ટ્રીય સ્વયંસેવક સંઘ (RSS)ના શતાબ્દી મહોત્સવ અંતર્ગત મહેમદાવાદમાં પથ સંચાલન અને શસ્ત્રપૂજનનુ આયોજન કરવામાં આવ્યું હતુ. આ પથ સંચલનમાં મોટી સંખ્યામાં સંઘના સ્વયંસેવકો જોડાયા હતા. વિજયાદશમીના દિવસે આર. એસ. એસ ની સ્થાપના થઈ હોવાથી દશેરાના દિવસે શતાબ્દી મહોત્સવની ઉજવણી કરવામાં આવી હતી. વર્ષ-1925 માં ડૉ. હેડગેવારે આર. એસ. એસની સ્થાપના કરી હતી. સંઘની સ્થાપનાના 100 વર્ષ એટલે કે શતાબ્દી વર્ષમાં પ્રવેશ નિમિત્તે રાજ્યભરમાં વિવિધ સ્થળોએ ભવ્ય કાર્યક્રમનું આયોજન કરવામાં આવી રહ્યું છે, ત્યારે શતાબ્દી વર્ષ નિમિત્તે સંઘ દ્વારા વર્ષભર સામાજિક સમરસતા,નાગરિક શિષ્ટાચાર, સ્વનો ભાવ-સ્વદેશી, પર્યાવરણ અને કુટુંબ પ્રબોધન એમ પંચપ્રાણ પાંચ વિષય પર સમાજમાં વધુ જાગૃતિ આવે તે માટે કાર્ય કરીને નાગરિકોને આ સત્કાર્યમાં જોડવામાં આવશે.

આ અંગે એક સ્વયંમસેવકે જણાવ્યું હતુ કે શતાબ્દી મહોત્સવ દરમિયાન સમાજને સંગઠિત કરવા અને રાષ્ટ્રીય ભાવના કેળવવા માટે વિવિધ કાર્યક્રમોનું આયોજન કરવામાં આવશે. પથ સંચાલન મહેમદાવાદ શહેરની શેઠ. જે. એચ. સોનાવાલા હાઈસ્કૂલ થી શરૂ થયું હતું. આ યાત્રા મહેમદાવાદ શહેરમાં ઢાળ વિસ્તાર, ભાવસારવાડ, જવાહર બજાર સહિતના માર્ગો પરથી પસાર થઇ પુનઃ નિજ સ્થળે પૂર્ણ થઈ હતી.માર્ગ પર વિવિધ સ્થળે શહેરીજનો દ્વારા આરએસએસના કેસરી ધ્વજને પુષ્પવર્ષાથી વધાવ્યો હતો. આ કાર્યક્રમનો મુખ્ય ઉદ્દેશ લોકોમાં રાષ્ટ્રીય વિચારધારા પ્રત્યે જાગૃતિ લાવવાનો હતો.